Блог Имама

Блог Верховного Муфтия

Әуе толқынында – «Қасиетті мәуліт»

Просмотров: 752

«Ғалам» атты алып кітапты адамзатқа түсіндіруші ақырғы Пайғамбар, соңғы Ұстаз дүниеге келген күн – қасиетті Мәуліт мерекесінің мәні мен мазмұнын халыққа кеңінен насихаттау туралы ҚМДБ – ның төрағасы, Бас мүфти, шейх Әбсаттар қажы Дербісәлі хазреттің тапсырмаларын жүзеге асыру мақсатында ҚМДБ – ның Павлодар облысы бойынша өкілдігі біршама іс – шаралар жоспарлап атқаруда.

Ақпан айының бірінші жаңасы – қасиетті жұма күні «Мәшһүр Жүсіп» мешітінің наиб имамы Күзенбаев Нұрлыбек облыстық қазақ радиосына «Дін әлемі» бағдарламасы бойынша «Қасиетті Мәуліт» тақырыбында бір сағаттық тікелей эфир арқылы уағыз – насихат айтты.

Журналист Сыбанжанова Раушанның «Мәуліт деген не?», «Мәуліт бидғат па?», «Құран Кәрімде Пайғамбарымыз (с.ғ.с.) туралы не айтылған?», «Мәуліт мерекесінің мазмұны неде?», «Алла Тағалаға және Алланың Елшісі асыл Пайғамбарымызға (с.ғ.с.) деген махаббатымызды арттырып, Оның (с.ғ.с) лайықты үмбеті болу үшін қандай амалдар жасауымыз қажет?», – деген біршама сауалдарына орай наиб имам Нұрлыбек Шәкизадаұлы:

- Қасиетті Құран Кәрімде «Расында сендерге іштеріңнен ардақты бір Пайғамбар келді оған қиналуларың ауыр тиеді. Сендерге өте ынтық, мүміндерге өте жұмсақ, ерекше мейірімді». (Тәубе сүресі, 128 – аят) – деген аятын келтіре отырып, Мәуліт күні – жер мен көк нұр шашқан Пайғамбарлардың сардары хазреті Мұхаммед (с.ғ.с.) – ның дүниеге келген күні дүниені нұрға толтырған Құдай тағала мейірім – рахымын молынан жаудырған тарихи бір күн.Мәуліт (арабша) – қазақша «туылған күн» деген мағынаны білдіреді.

Мәуліт күні адам баласын надандық пен жәһилет қараңғылынан жарыққа шығарған күн.

Мәуліт күні – пұттардың жерге құлап, мыңдаған жылдар бойы сөнбей келе жатқан отқа табынушылардың оттарының сөнген күні. Пайғамбарымыз (с.ғ.с.) Арабстанда Хиджаз өлкесінде, Мекке қаласының шығысындағы Хашим әулеті махалласында хижрий жыл санауының рабиал – әууал айының 12 – сі, милади жыл санауының 571 жылы 20 – сәуірде дүйсенбі күні таңертең дүниеге келді.

Әкесі Абдуллаһ қайтыс болғандықтан ұлын көре алмай кетті.

Хазреті Мұхаммед туылған соң атасы Абдул – Мутталиб үлкен той жасайды. Құрайш руының ұлықтарын шақырады. Сүйікті немересіне қандай ат қойдың дегенде: «Мұхаммед» деп ат қойдым», - деді.

Олар: «Ата – бабаларымыздың арасында мұндай аты бар адам болмаған, бұл атты қоюдағы мақсатыңыз не?», - деп сұрады.

Абдул – Мутталиб: «Мен немеремді аспанда Хақ Тағала, жерде халық көп мақтайды деп үміттенемін », - деп жауап берді.

Пайғамбарымыз (с.ғ.с.) 4 жасқа дейін сүт анасы Халиманың бауырында өсті.

6 жасында Мәдинеге сапар шегіп, қайтып келе жатқанда анасы Әмина қайтыс болады. Сөйтіп пайғамбарымыз (с.ғ.с.) таза жетім қалады.

Сахабалар: «Ей, Алланың елшісі! Пайғамбарлық саған қашан берілді?» - деп сұрағанда, Пайғамбарымыз (с.ғ.с.) былай деп жауап берді: «Адам (с.ғ.с.) рух пен дененің арасында болған кезде…»

Алла Тағала Құран Кәрімде бұл туралы былай дейді:

«Әй, Пайғамбар! Сөз жоқ, сені бір куә әрі қуантушы, ескертуші етіп жібердік. Алла жаққа, Оның нұсқауымен шақырушы бір нұрлы шырақ түрінде жібердік. (Ей, Мұхаммед! ) мүміндерді рас оларға Алладан, ірі игілік барлығын шүйіншіле. Кәпірлер мен мұнафықтарға бой ұсынба. Олардың жәбір – жапаларын елеме. Аллаға тәуекел ет. Алла кепілдікте жетеді». («Азха» сүресі, 45 – 48 аяттар.)

Сүйікті Пайғамбарымыз (с.ғ.с.) бір хадис – шарифінде былай деген: «Кімде – кім таңертең және кешке: «Раббім – Аллаһ, дінім – ислам, Пайғамбарым – Хазреті Мұхаммед (с.ғ.с.) деп шын көңіліммен сендім»,- десе, ол кісі ақиқат жәннәтқа кіреді».

Пайғамбар (с.ғ.с.) Аллаһ тағаладан әрдайым әдемі мінез-құлық сұрайтын:

«Ей, Аллаһ! Жаратылысым және мінезімді жақсы қыла көр!»

Алла Тағала да ол туралы Құран Кәрімде:

«Шын мәнінде сен, әлбетте, ұлы мінезге иесің» - деп айтқан еді.

Құрметті мұсылман бауырлар! Ақпан айының 16 – жұлдызы 15.00 сағатта Естай атындағы қалалық мәдениет сарайында Мәуліт мерекесінің құрметіне арналған әдеби көркем-рухани кеш ұйымдастырылады. Оған елімізге танымал әншілер мен ақындар, өнерпаздармен қоса облысымыздың да өнерлі жастары иләһи ән-жырларымен қатысатын болады. Келіңіздер, көріңіздер, барлықтарыңызға есік ашық, бірігіп Пайғамбарға (с.ғ.с.), сахабаларына салауат оқиық. Иманымызды арттырып, толықтыратын уағыз-насихат тыңдайық. Білмейтіндерге, бұл күні Пайғамбарымыз (с.ғ.с.) дүниеге келіп, дүниені нұрландырған күні екенін үйретейік. Пайғамбарымыз (с.ғ.с.) өмірінен, оның жібектей мінез – құлқы мен пәк жаратылысын бір – бірімізге айтып еске түсірейік. Оның өнегелі, тек қана жақсылыққа толы өмірінен, көркем мінез-құлқынан үлгі алайық.

Мәуліт күндері мешіттерге барып, мәуліт – шәріп және уағыз – насихат тыңдайық. Мүмкіндігінше бала – шағамызды да бірге ала барып, оларға да тыңдатып, үлгі көрсетуіміз керек. Олардың да көңілдерінде мешітке, жамағатқа деген ықыластары артып, Алла Тағала және Пайғамбарына (с.ғ.с.) деген сүйіспеншілігі күшеюі үшін, өзімізбен бірге ала барған жөн. Келешек ұрпағымызға Аллаға құл, Мұхаммедке (с.ғ.с.) үммет болудың қандай шарапатты нәрсе екенін сезіндірейік. Харам нәрселерді істемеуді, Ислам және Құран жолын мықтап ұстауды үйретейік.

Бұл күні қаза болған намаздарымызды оқып, тәубе етіп, истиғфар айтуымыз керек. Алла Тағаладан күнәларымыздың жарылқауын тілейік. Пайғамбарымызға (с.ғ.с.) көп – көп салауат айтып, Құран Кәрім оқып, сауабын Пайғамбарымыздың (с.ғ.с.) рух – шарифіне, сахабаларына, ата – бабаларымыздың және барлық мүміндердің рухына бағыштайық. Балаларымызға оның мәні мен маңызын түсіндірейік.

Мәуліт шарапатымен көңілдерімізді тазалап, Алла Тағалаға және Пайғамбарымызға (с.ғ.с.) деген махаббатымызды арттырайық. Себебі Пайғамбарымыз (с.ғ.с.) хадис – шарифінде:

«Сендердің ешқайсыларың мені ата – анасынан, бала – шағасынан және барлық адамзаттан артық жақсы көрмейінше, шын иман келтіре алмайсыңдар», - деген – деп сөзін аяқтады.

Амантай ТОЙШЫБАЙҰЛЫ

Обновлено (07.02.2013 10:32)